瞿秋白上海打仗景致

上海打仗景致

　　诸位静心听呀，唱点啥事情？要唱一只上海打仗景呀，让我末细细说分明呀，从头那个到底末唱与大众听。
　　有钱东洋人呀，本来呒理性，要求条件市长在答应呀，百姓末死也勿甘心呀！日本那个军阀末马上就派兵。
　　大炮搿轮腾呀，洋枪匹拍声，打仔一夜死脱呒淘成呀！东洋末发急讨救兵呀，再来那个几千末冲锋死干净。
　　打仔十几仗呀，仗仗吃败仗。东洋小兵勿肯开洋枪呀，军官末眼睛白洋洋呀，活人那个装来末死尸回东洋。
　　小兵十九路呀，本领实在大。东洋军队一点无生路呀，日夜末装来三万多呀，冲突那个几天末仍旧打勿过。
　　胜仗打勿成呀，军官太可恨，公共租界一步勿准进呀，日本末勿用怕追兵呀，中国那个小兵末永久打勿胜。
　　永久打勿胜呀，失败早存心，党国大人害怕小百姓呀，打仗末只要骗骗人呀，放仔那个租界末安顿日本兵。
　　日本真野蛮呀，飞艇掷炸弹，闸北地方房子在炸坍呀，人家末烧脱交交关呀，害得那个百姓末一齐要遭难。
　　说起逃难人呀，苦处说不尽，单身出来腰无半分文呀，大哭末小喊顶伤心呀，只有那个富人末老早搬端正。
　　东洋便衣队呀，要拿百姓害，男女捉去一淘关起来呀，妇女末衣裳要解开呀，调戏那个以后末拖来就强奸。
　　虹口老百姓呀，捉去最伤心，麻绳捆绑再要挖眼睛呀，弄得末性命活勿成呀，毒害那个大众末将来有报应。
　　啥人来报应呀，全靠小百姓。东洋中国一致来革命呀，反对末东西洋大人呀，穷人那个出路末只有义勇军。
　　国贼大商人呀，老早要调停，答应条件命令叫退兵呀，端正末拍卖上海城呀，请求那个英美末大家来瓜分。
　　穷人顶要紧呀，万众一条心，对内对外革命才赞成呀，有志末加入义勇军呀，驱逐那个国贼末幸福过光阴。

梦远书城(guxuo.com)